पोखरा न्यूज । पोखरा तर्फ आउँदै गरेको कार त्रिशुली नदीमा खस्दा तीनजना बेपत्ता भएका छन् । दुर्घटनामा एक जना घाइते भएका छन् ।
काठमाडौँबाट पोखरातर्फ आउँदै गरेको ग २च ४९१८ नम्बरको कार इच्छाकामना गाउँपालिका–५ नाग्दीखोलास्थित पृथ्वी राजमार्गबाट झण्डै ३५ मिटर तल नदीमा कार खस्दा चालकसहित तीन जना बेपत्ता भएको प्रहरीले जनाएको छ ।
प्रहरीका अनुसार बिहीबार राति ११ः४५ बजे भएको घटनामा पोखरा महानगरपालिका–१७ का ६० वर्षीय प्रेमबहादुर भुजेल, ५५ वर्षीय लेखराम भुजेल र उहाँकी श्रीमती ३६ वर्षीया ईश्वरी भुजेल कारसहित बेपत्ता भएका छन् ।
कार दुर्घटनामा परी पोखरा महानगरपालिका–१७ का ४६ वर्षीय रुद्रलाल सुवेदी घाइते हुनुभएको छ । उहाँको भरतपुरस्थित कलेज अफ मेडिकल साइन्सेजमा उपचार भइरहेको छ ।
बेपत्ता भएकाको खोजी कार्य भइरहेको प्रहरीले जनाएको छ ।
