नेसपाको विधान अधिवेशन सकियो, राष्ट्रिय महाधिवेशन माघमा गर्ने निर्णय

पोखरा । नेपाल समाजवादी पार्टी (नेसपा) को दुई दिने प्रथम विधान अधिवेशन सकिएको छ । पोखरामा सम्पन्न अधिवेशनले आगामी माघ २५ देखि २७ गतेसम्म काठमाडौँमा राष्ट्रिय महाधिवेशन गर्ने निर्णय गरेको छ ।

विधान अधिवेशनले माघ २५ गतेदेखि महाधिवेशन गर्ने पार्टी सचिवालय बैठकको निर्णय पारित गरेको नेसपा गण्डकीका अध्यक्ष किरण थापाले जानकारी दिए ।

यसैगरी अधिवेशनले पार्टीको नाम परिर्वतन गरी नेपाल समाजवादी पार्टी (नयाँ शक्ति) बनाएको छ । महाधिवेशनमा प्रत्येक पार्टी सदस्यले प्रत्यक्ष मतदान गर्ने व्यवस्था गरिएको थापाले बताए ।

अधिवेशनले पार्टीको केन्द्रीय समिति ९९ सदस्सीय र ११ सदस्यीय पदाधिकारी हुने व्यवस्था गरेको छ ।

साथै पदाधिकारीहरूमा एक अध्यक्ष, पाँच उपाध्यक्ष (एक महिला, एक जनजाति, एक मधेसी, एक खसआर्य र एक दलित), एक महासचिव, तीन सचिव र एक कोषाध्यक्ष रहनेछन् ।

पार्टीका सबै तहमा प्रत्यक्ष निर्वाचन प्रणालीबाट नेतृत्व चयनको व्यवस्था पारित गरिएको अध्यक्ष थापाले जानकारी दिए ।

पार्टीमा युवाको नेतृत्व स्थापित गर्न स्थानीय तहमा ४०, प्रदेशमा ३० र केन्द्रमा २० प्रतिशतको व्यवस्था गरिएको छ ।

यस्तै सबै समितिमा महिला पदाधिकारी ३३ प्रतिशतको रहेने व्यवस्था पनि गरिएको नेसपाले जनाएको छ ।

अधिवेशनमा अधिवेशनमा ७१ जिल्ला र विदेशबाट गरी कूल पाँच सय प्रतिनिधि सहभागी रहेका थिए । अधिवेशन कात्तिक ५ गतेदेखि पोखरा सभागृहमा सुरु भएको थियो ।

अधिवेशनमा पार्टीका सचिवालय सदस्य एवं विधान तथा घोषणापत्र मस्यौदा समितिका संयोजक डा जनक शाहले पार्टीको घोषणपत्र र सचिवालय सदस्य एवं अधिवक्ता कृष्ण शर्माले पार्टीको विधान प्रस्तुत गरेका थिए ।

प्रस्तुत घोषणापत्र र विधानबारे सहभागीबीच समूह बनाएर समूहगत छलफल गरी पारित गरिएको हो ।

विसं २०७२ असोजमा नयाँ संविधान बनेपछि संयोजक भट्टराईले तत्कालीन एकीकृत नेकपा माओवादी परित्याग गरी ‘नयाँ शक्ति’ नामक अभियान सञ्चालन गरेका थिए ।

त्यसपछि नयाँ शक्ति नेपाल पार्टी घोषणा गरेका भट्टराईको पार्टीको नाम परिवर्तन हुँदै नेपाल समाजवादी पार्टी बनेको थियो ।