पोखरा । पोखरा महानगरपालिकाको व्यवस्थापन र चिल्ड्रेन नेपालको सहयोगमा पोखरा क्षेत्रका सडक वालवालिका हाल कास्कीको अन्नपूर्ण गाउँपालिका १ स्थित लेवाडेमा आश्रित छन् ।
कोरोना भाइरसको संक्रमण नहोस भन्दै महानगरले चैत १६ गते पोखरा क्षेत्रका सडकबाट जिल्ला प्रहरी कार्यालय कास्कीको समेत सहयोगमा उनीहरुलाई उद्दार गरि लेवाडेमा लगेर व्यवस्थापन गरेको हो ।
शुक्रबार चिल्ड्रेन नेपालको भवनमा रहेका ३ वालिका सहित १६ जना बालावलिकाहरुको अवस्थाबारे बुझ्न पुगेका गण्डकी प्रदेश सांसद रामजी बराल (जिवन) ले उनीहरुलाई पारिवारिक वातावरण सिर्जना गर्न सवैले सहयोग गर्नुपर्ने बताए ।
सडकमा रहेका वालवालिकाहरुलाई महानगरसहितका अन्य संघ संस्थाको सहयोगमा एकिकृत ढंगले व्यवस्थापन गरिएकोले यसमा सवैले साथ र सहयोग गर्नुपर्नेमा उनले जोड दिए । सांसद बरालले उनीहरुको स्वास्थ्य अबस्थाको बारेमा समेत चासो दिएका थिए ।
यसैबिच, सांसद बरालले शुक्रबार पोखरामा राहत वितरणको अवस्थाबारे बुझ्दै वडा – २५ हेमजा देखि पोखरा – १८ को सराङकोटसम्म पुगेका छन् । सो क्षेत्रमा राहत वितरणको अवस्थाबारे बुझ्दै सांसद बरालले बिषम परिस्थितीमा चुल्हो नै वाल्न नसक्ने वास्तविक व्यक्तिहरुको पहिचान गरी सामाजिक दुरी कायम गर्दै राहत वितरण गर्न सुझाव दिएका थिए ।
हेमजा क्षेत्रमा ६ सय ८० घर धुरीलाई राहत बितरण गर्न शुरु गरिएको पोखरा -२५ का वडा अध्यक्ष शोभाकर तिमिल्सिनाले बताए । वडामा करिब ८५ घर परिवार छुट्न गएको उनले जनाए । ३ सय १० घर परिवारले भने आधा प्याकेज १ हजार मुल्य बराबरको राहत पाउने भएको अध्यक्ष तिमिल्सिनाले बताए ।
पोखरा १८ का वडा अध्यक्ष रणबहादुर थापाले वडामा केही दिनमा राहत वितरण हुने भएको बताए ।